Vyādhipraśamanaparivartaḥ
Technical Details
|| vyādhipraśamanaparivartaḥ ||
bhūtapūrvaṃ kuladevate'tīte'dhvanyasaṃkhyeyatarairvipulairacintyairaprameyairyadāsīttena kālena tena samayena ratnaśikhī nāma tathāgato'rhansamyaksaṃbuddho loka utpanno vidyācaraṇasaṃpannaḥ sugato lokavidanuttaraḥ puruṣadamyasārathiḥ śāstā devānāṃ ca manuṣyāṇāṃ ca buddho bhagavān | tena khalu punaḥ kuladevate kālena tena samayena tasya bhagavato ratnaśikhinastathāgatasyārhataḥ samyaksaṃbuddhasya parinirvṛtasya saddharmasyāntarhitasya saddharmapratirūpake parivartamāne sureśvaraprabho nāma rājā babhūva | dhārmiko dharmarājo dharmeṇa rājyaṃ pālayamāno nādharmeṇa mātāpitṛkalpaḥ sarvaviṣayavāsināṃ sattvānām ||
tena khalu punaḥ kuladevate kālena tena samayena tasya rājñaḥ sureśvaraprabhasya viṣaye jaṭiṃdharo nāma śreṣṭhī babhūva ||
vaidyaḥ cikitsakaḥ paramadhātukuśalo'ṣṭāṅgenāyurvaidyaśāsreṇa samanvāgato babhūva | tena khalu kuladevate kālena tena samayena tasya jaṭiṃdharasya śreṣṭhino jalavāhano nāmnā śreṣṭhiputra utpanno babhūva | abhirūpaḥ prāsādiko darśanīyaḥ paramayā śubhavarṇapuṣkaratayā samanvāgato nānāśāstrakuśalaḥ sarvaśāstragatiṃgato lipisaṃkhyāgaṇanākuśalaḥ sarvaśilpī babhūva | tena khalu punaḥ kuladevate kālena tena samayena tasya rājñaḥ sureśvaraprabhasya viṣaye'nekāni sattvaśatasahasrāṇi nānārogaspṛṣṭānyabhūvan | nānāvyādhiparipīḍitāni duḥkhāṃ tīvrāṃ kharāṃ kaṭukāmamanāpāṃ vedanāṃ vedayanti ||
tena khalu punaḥ kuladevate kālena tena samayena tasya jalavāhanasya śreṣṭhiputrasya teṣāmanekeṣāṃ sattvaśatasahasrāṇāṃ nānārogaspṛṣṭānāṃ nānāvyādhiparipiḍitānāmarthāya paramakāruṇyaṃ cittamutpanno babhūva | etānyanekāni sattvaśatasahasrāṇi nānārogaspṛṣṭāni nānāvyādhiparipīḍitānyetarhi duḥkhāṃ tīvrāṃ kharāṃ kaṭukāmamanāpāṃ vedanāṃ vedayanti | ayaṃ ca mama pitā jaṭiṃdharaḥ śreṣṭhī vaidyavicikitsakaḥ paramadhātukuśalo'ṣṭāṅgāyurvaidyaśāstreṇa samanvāgato vṛddho jīrṇo mahallako'dhvagato vayo'nuprāpto jīrṇamavasthāpya pravepamāṇaḥ kāyo yaṣṭimālambya yatra yatra sarvatra grāmanagaranigamarāṣṭrarājadhānīṣūpasaṃkrāmati | etānyanekāni sattvaśatasahasrāṇi nānārogaspṛṣṭāni nānāvyādhiparipīḍitāni nānāvyādhobhyaḥ parimocayituṃ yaṃ nūnamahamimameva pitaraṃ jaṭiṃdharamupasaṃkramitvādhikauśalyaṃ paripṛccheyam | yena dhātukauśalyena paripṛṣṭenāhaṃ sarvatra grāmanagaranigamajanapadarāṣṭrarājadhānīṣūpasaṃkramiṣyāmi | upasaṃkramya tānyanekāni sattvaśatasahasrāṇi nānārogaspṛṣṭāni nānāvyādhiparipīḍitāni nānāvyādhibhyaḥ parimocayiṣyāmi |
tena khalu punaḥ kuladevate kālena tena samayena jalavāhanaḥ śreṣṭhiputro yena svapitā jaṭiṃdharaḥ śreṣṭhī tenopajagāma | upetya svapiturjaṭiṃdharasya pādau śirasā vanditvā kṛtāñjalipuṭo bhūtvaikānte'sthāt | ekānte sthito jalavāhanaḥ śreṣṭhiputraḥ svapitaraṃ jaṭiṃdharaṃ śreṣṭhinamimābhirgāthābhirdhātukauśalyaṃ pṛcchati sma ||
tānīndriyāṇi lakṣante parivartanti dhātavaḥ |
kena kālena jāyante vyādhayaśca śarīriṇām || 1 ||
bhojanaṃ ca kathaṃ bhuktvā kāle kāle sukhāvaham |
yenāntaraśarīrasya kāyo'gninopahanyate || 2 ||
kathaṃ cikitsā kartavyā vāte pitte śleṣmike tathā |
saṃnipāte samutpanne kathaṃ vyādhiśāntaye || 3 ||
kiṃ kāle kupyate vātaḥ pittaṃ kupyate kadā |
kiṃ kāle kupyate śleṣmā yena pīḍyanti mānavāḥ || 4 ||
atha khalu jaṭiṃdharaḥ śreṣṭhī jalavāhanasya śreṣṭhiputrasyābhirgāthābhirdhātukauśalyaṃ viditvā deśayate sma ||
varṣā cātra trayo māsāstrayaśca śāradaṃ smṛtam |
trayastathaiva hemāntastrayaśca grīṣmikastathā || 5 ||
ityeva māsakramaḥ ṣaḍṛtūni
saṃvatsaradvādaśamāsikaṃ smṛtam |
annaṃ ca pānaṃ ca tathā ca jīryate
vaidyāśca kauśalyasmṛtipradarśitāḥ || 6 ||
te cāpi saṃvatsaraparvamantare
parivartantīndriyadhātavo'pi |
parivartamānāni ca indriyāṇi
vicitravyādhirbhavate śarīriṇām || 7 ||
tatraiva vaidyasya catuḥ prakāraṃ
trimāsaparvāntare ṣaḍṛtūni |
ṣaḍdhātukauśalyaprajānitavyaṃ
yathākramaṃ bhojanamauṣadhaṃ ca || 8 ||
vātādhikārāḥ prabhavanti varṣe
pattiprakopaḥ śaradi prasanne |
hemantakāle tatha saṃnipātaṃ
kaphādhikārāśca bhavanti grīṣme || 9 ||
snigdhoṣṇalavaṇāmlarasāśca varṣe
śaratsu snigdhaṃ madhuraṃ ca śītam |
madhurāmlasnigdhaṃ ca hemantakāle
rūkṣoṣṇakaṭukāni ca grīṣmakāle || 10||
kaphādhikaḥ kupyati bhuktamātre
pittādhikaṃ kupyati jīryamāṇe |
vātādhikaḥ kupyati jīrṇamātre
ityeva dhātutritayaprakopaḥ || 11 ||
saṃbṛhaṇaṃ kurvatu nirātmakasya
virecanaṃ pittavivardhanaṃ ca |
triguṇopapannaṃ tatha saṃnipāte
praśamaṃ ca kuryātkaphaparvamantare || 12 ||
vātādhikaṃ paittikasannipāte
kaphādhikaṃ parvasu jānitavyam |
yatkāla yaddhātu yadāśrayaṃ ca
tadannapānauṣadhi darśitavyamiti || 13 ||
atha khalu jalavāhanaḥ śreṣṭhiputrastenaivaṃrūpeṇa naimittikena dhātukauśalyena paripṛṣṭena sarvāṣṭāṅgāyurvaidyamadhigato'bhūt | tena khalu punaḥ kuladevate kālena tena samayena jalavāhanaḥ śreṣṭhiputro rājñaḥ sureśvaraprabhasya viṣaye sarvagrāmanagaranigamajanapadarāṣṭrarājadhānīṣūpasaṃkramitvā sarveṣāmanekeṣāṃ sattvaśatasahasrāṇāṃ nānārogaspṛṣṭānāṃ nānāvyādhiparipīḍitānāmevamāśvāsayāmāsa | mā bhaiṣurvaidyo'smi vaidyo'smītyātmānaṃ pratijñātavānahaṃ yuṣmākaṃ nānāvyādhibhyaḥ parimocayiṣyāmi | sahaśravaṇena kuladevate tasya jalavāhanasya śreṣṭhiputrasyedamevaṃrūpaṃ vacanaṃ vyāharamāṇasya sarvāṇi tānyanekāni sattvakoṭīniyutaśatasahasrāṇi mahāpraharṣajātāni babhūvuḥ | āśvāsaprāptānyacintyaprītisaumanasyena samanvāgatāni babhūvuḥ | tāni tena kālena tena samayena tayā praharṣayānekāni sattvakoṭīniyutaśatasahasrāṇi nānārogaspṛṣṭāni nānāvyādhiparipīḍitāni nānārogebhyaḥ parimocayitānyarogāṇi ca babhūvurvigatavyādhīni ca | yathā paurāṇena sthāmabalavīryeṇa samanvāgatāni babhūvuḥ | tena khalu punaḥ kuladevate kālena tena samayena teṣāmanekeṣāṃ ca sattvakoṭīniyutaśatasahasrāṇāṃ nānārogaspṛṣṭānāṃ nānāvyādhiparipīḍitānāṃ ye kecidgāḍhatareṇa spṛṣṭā ca babhūvuḥ | te sarve yena jalavāhanaḥ śreṣṭhiputrastenopasaṃkrānta upasaṃkramyaiva ye ca kiṃcitteṣāṃ sattvakoṭīniyutaśatasahasrāṇāṃ nānārogaspṛṣṭānāṃ nānāvyādhiparipīḍitānāmauṣadhividhānānyabhinirdiśanti sma | tattāsu rājadhānīṣu sarvāṇi tānyanekāni sattvakoṭīniyutaśatasahasrāṇi nānārogaspṛṣṭāni nānāvyādhiparipīḍitāni jalavāhanena śreṣṭhiputreṇa nānāvyādhibhyaḥ parimocitāni babhūvuriti ||
iti śrīsuvarṇaprabhāsottamasūtrendrarāje vyādhipraśamana
parivarto nāma saptadaśaḥ ||